بأقلام القراء .. هالة منير تكتب لسه الإله فرعون
2011-11-22 14:17
مولود إله مش نبي
وسِبْت البنات يا غبي
بس فِضِلَّكْ صَبِي
هُوَّ اللي عَالْ مساكين
.....
هُوَّ اللي شَالْ طُغيان
ونادى بالإيمان
بخالق الأكوان
وَبَلَعْلَكْ التَّعَابين
.....
تِبْنِي لي في مسلة
تشربني من قُلَّة
وعايشلي في فيلَّا
وانا من الصابرين
......
آكل أنا ف نفسي
من حقي من نِفسي
أصنع أنا لِبسي
وإن كنت م الخايبين
......
اقعد على القهوة
وأدندن الغنوة
وأعاكس الحلوة
وانضم للخايفين
......
هافتح أنا بُقي
على قِسم ف الدُقي
وعلقة من حقي
وابقى من المساجين
.......
لو ماشي مع الحيطة
وما دخلت في الزيطة
ما أفشني أبو شريطة
وما اصْعِبْت عَ المحامين
......
تُبُص تِلْقى دْقُون
مِتْلَزَّقَة بمعجون
بَسْ اللسان مسنون
هيطلَّعك مجنون
وإن كنت مِ العاقلين
.....
لو قِلِّة الحيلة
وحاجة العيلة
وصعوبة الشيلة
تِذِل بني آدميين
.....
خَلِّي الضمير مسجون
والعقل دا ملعون
هيخرجك م الكون
لازم تقول آمين
......
خَلِّي اللسان صاحي
وحالي دا نُواحي
بسيوفي ورماحي
حقوقنا يا ملاعين
.....
ورب موسى وهارون
وثورة ف ميدان وطاحون
ودم شهيد في ماعون
عشانكوا يا مصريين
تعليقات القراء