«تقدم لها معاون مباحث وآخر معد تليفزيون» .. والد «نيرة أشرف» يكشف «كواليس جريمة المنصورة» التي هزت مصر

الموجز

قال أشرف عبد القادر، والد الطالبة نيرة عبد القادر، التي ذبحها زميلها أمام جامعة المنصورة ، في تصريحات خاصة أدلى بها إلى "مصراوي"، إنه لن يقيم عزاء إلا عندما يتحاكم الجاني على جريمته.

وأضاف عبد القادر،  : ".. أنا مش هعمل عزاء غير لمَّا يتحاكم المتهمة على جريمته، مش عامل عزاء والله.. مش هاخد عزاء بنتي دلوقتي، هعمل عزاء يوم ما يتحاكم الجاني، هاقدر ساعتها آخد حقها، وآخد عزاءها إزاي ودمها لسَّه مابردش".

وتحدث قائلًا: "الولد بيحبها بقاله سنتين، وجالي وقولتله يا ابني هي مش عايزة تتجوز دلوقتي خالص، لا أنت ولا غيرك، هي بتدور على مصلحتها ومستقبلها، ورُحت بيت أهله عشان أشتكي لهم، قالوا لي إنت عايز تجوز بنتك لُه؟ قُلت لهم لأ، ده اللي عامل لينا مصايب، والناس شاهدة على الموضوع ده، وعملت له كذا محضر، وفي الآخر يدبحها كده!".

وأوضح والد نيرة: "عملت له محضر في شرطة الإنترنت، عشان كان فاضحنا، عملت محضر في قسم أول، عملت المحضر يوم 13 أبريل اللي فات، عملت المحضر عشان كان بينشر صور ومبهدلنا آخر بهدلة، وماعرفش إنه مرقد لها، بيقول لهم في النيابة ساعة ما اعترف أنا ناوي أقتلها من شهر رمضان.. يعني كان ناوي يقتلها ومرقد لها من شهر رمضان!".

وقال أشرف عبد القادر، بشأن صحة ما قالته رئيس قسم اللغات الشرقية في جامعة المنصورة بشأن تفوق المتهم بقتل ابنته: الغريب فعلًا إنه ذكي جدًّا ومشغل ذكاءه علينا احنا، وبهدلها آخر بهدلة".

ولا كانت هتتجوز خالص

وقال والد نيرة، بشأن صحة خطبة ابنته من شخص آخر، وهو ما أثار استياء المتهم: "ولا كانت هتتجوز خالص؛ لا اتخطبت ولا كانت ناوية تتخطب، كل ما يتقدم لها حَد تقول لي يا بابا أنا بادور على مستقبلي، مش عايزة أتجوز وأقعد في البيت".

تقدم لها معاون مباحث في القاهرة

وتابع أشرف، بشأن الفيديو المنتشر لوالدة المتهم بشأن إقامة فرح لخطبة نيرة من شخص آخر: "ولا عملنا فرح ولا حاجة، يعني هنخطبها ونداري؟! تقدم لها معاون مباحث في القاهرة، وتقدم لها معد تليفزيوني، وقالت لأ".

وأكمل والد نيرة: "المتهم في حي أول، وأنا في حي تاني، هو في شرق البلد، وأنا في غربها.. المعرفة جت في الجامعة".