بلال فضل: صباحي "فاشل" كرئيس ولكن كنائب رئيس "هايل"!!
كتب: نبيل عطية
واصل الكاتب "بلال فضل" هجومه على "حمدين صباحي" المرشح لرئاسة الجمهورية، مؤكدا أنه لا يصلح لتولي منصب رئيس مصر.
وكتب "فضل" مجموعة من التغريدات على حسابه الشخصي بموقع "تويتر" قال فيها: "أيوه أنا شايف حمدين فاشل كرئيس بس كنائب رئيس هايل لإنه مش هيعمل حاجة غير الخطب والشعارات وراجل كلامه حلو وضحكته حلوة وشيك مشرف يعني كمظهر".
وأضاف: "بما إن المشروع القومي الناصري خرب مصر والحمد لله ودخلها في حكم عسكر وإحنا خايفين من الإسلاميين تعالوا بقى نديله فرصة تانية يخربها تاني".
وأكمل: "لست ضد حمدين كشخص بل كرئيس وكنت أتمنى إنه يقبل بأن يكون نائبا لأبو الفتوح أو لخالد أو للبسطويسي، هذا مكانه الطبيعي في نظري والحكم للناس".
وأردف قائلا: "بالمناسبة اللي بيقولك أصلك بتعمل ده عشان أبو الفتوح يكسب، أنا مقتنع بأبو الفتوح كمبدأ وقلت مرارا عارف إن الإعادة هتبقى بين مرسي وموسى".
وأضاف: "بتضحكني حكاية تفوق الصباحي في استطلاعات الرأي، لاهو إنتو ماعرفتوش إن الإخوان إدوا أوامر لأنصارهم يصوتوا له في الإستطلاعات ضربا لأبو الفتوح".
واختتم "فضل" تغريداته قائلا: "عموما أنا مع اختيار الناس أيا كان لإني عارضت مبارك وشاركت في الثورة من أجل حق الناس في الاختيار مش عشان يختاروا اللي على مزاجي، وعلى فكرة هما يومين تلاتة اللي اتكلمت فيهم عن حمدين وكفاية عليه كده خلي أنصاره يعيشوا بقى شتايم لغاية ما الجماهير الغفيرة تنصبه زعيما.سلام".