متخانقين على فستان معفن.. رامز جلال يسخر من سمية الخشاب وأيتن عامر في رامز جاب من الآخر

وقعت النجمتان سمية الخشاب وأيتن عامر في فخ حلقة اليوم من برنامج "رامز جاب من الآخر"، الذي يقدمه الفنان رامز جلال عبر قناة MBC مصر، واستقبلهما رامز بطريقته الساخرة.

وقال رامز قبل وصول أيتن عامر وسمية الخشاب: "بلطيتين من نفس التقسيمة والقطعية، عملوا قلق في الوسط الفني وكان بينهم أتفه قضية، قال إيه دي لبست فستان ديا، طيب وإحنا مالنا يا ولية. إلا ما شوفت لكم دور أثر فيا، أو حتى جايزة من مهرجان الدقهلية، مبطرخين ومكلبظين، وعمالين تاكلوا فول بالتقلية، فين الوسط واللياقة البدنية".

وقال رامز جلال لحظة لقائه مع سمية الخشاب: "جاية ببدلة الفضاء، لابسة فويل، والشراب تحس إن تحته شنكار، فين الركب؟"، لترد قائلة: "أنا ست كلبوظة عجوزة".

وسأل رامز سمية الخشاب عن اتهام أيتن عامر لها بأنها: "مش بتعرفي تلبسي ولا تتكلمي، ومش بتفهمي في الموضة"، لترد قائلة: "كلام فاضي".

كما سألها عن دور سائقة الميكروباص الذي تلعبه في مسلسل "بـ 100 راجل" في رمضان، وعقب قائلا: "في سواقة ميكروباص بالخدود دي؟ بتاخدي الأجرة كولاجين ولا بوتكس"، لتعقب سمية الخشاب قائلة: "يا قليل الأدب".

وبعد استقباله أيتن عامر، قال رامز: "إيه الترينج ده، عاملة تسريحة شريفة فاضل، 5 كوافيرات اشتغلوا علشان القبة اللي فوق، تسريحة أمنا الغولة، والمكياج إتعمل والنور قاطع".

وسأل رامز أيتن عامر: "هل قلدت أيتن سمية الخشاب ولبست نفس الفستان؟"، لترد قائلة: "مكنتش مقلداها، وما شوفتهاش أصلا"، ليعقب رامز قائلا: "إنتو الإثنين اتخانقتوا على فستان معفن".

كما سأل رامز أيتن: "ريهام حجاج إدتك حسابك ومشتك من المسلسل بتاعها؟"، لترد قائلة: "ما أخدتش فلوسي في باقي المسلسل لغاية دلوقتي. خلصت دوري كله والدور اتشال".