بالصور .. استغاثت بالنجدة فلم يستجيبوا لها .. حاولت تصوير العصابة فقاموا بالإعتداء عليها .. دائري المعادي بلا أمان!

الموجز - كتب : محمد علي هاشم 

أصبحت منصة التواصل الإجتماعي هى صوت المواطنين في كل العالم ، تسلط الضوء على مشاكلهم ، تحرك آلاف الأشخاص للمساعدة والإنقاذ ، وفي هذا السياق شاهدنا العديد من الأمثلة التي ساهمت مواقع التواصل الإجتماعي في حل مشاكل أصحابها، من المساهمة في اجراء عمليات جراحية باهظة التكاليف أو استعادة حقوق مظلومين وغيرها ، ولكن مهما ساعدت على عودة الحقوق لن توفر "الأمن والحماية" للمواطن في الطريق فهذا هو دور الشرطة.

- على موقع التواصل الإجتماعي فيس بوك تداول النشطاء واقعة الإعتداء على مواطنة حاولت تصوير إحدى عصابات السرقة المنتشرة على الطريق الدائري، وذلك بعد ان حاولت ابلاغ النجدة أكثر من مرة كما ذكرت في المنشور. 

وكتبت المواطنة دعاء صبحي: 

فى طريق مرواحى كل يوم بأخد الدائرى من المعادى للبحر الاعظم . الطريق ده تقريبا واقف كل يوم من ٥ ل ٨ معاد المرواح .. فى يوم شوفت اتنين على موتسكيل فى الاتجاه التانى .. ماشيين عكس اتجاهم ومع اتجاهنا .. واحد شاور على عربية قدامى والتانى نزل عدى الجزيرة اللى فى النص فتح الباب على الراجل اللى فى العربية و شد تلفونه وطلع جرى على الموتسكل اللى صاحبه مستنيه به .. طبعا محدش هيعرف يمسكه ولا يجيبه الأتجاه اللى احنا فيه واقف والاتجاه اللى هما فيه سالك وهما على موتوسيكل .. فا صاحب الموبيل المسروق مابينزلش حتى من العربية .. "اول مرة" شفتهم كانت صدمة وحمدت ربنا انى بقفل ال lock والإزاز .. بقول "اول مرة" علشان شفتهم بعد كده ٦ مرات نفس السيناريو .. ومش مرة واحده لأ دول بيجروا شويه ويرجعوا يوقفوا يعمله نفس الحركة تانى مستلمين الصف اللى اقصى الشمال المتجهين للجيزة ..
حاولت اكون إيجابية وكلمت الداخلية قالولى مش تبعنا تبع نجدة الجيزة .. كلمت نجدة الجيزة قلولى بيحصل فين على الدائرى بالظبط قلتلهم مش مكان معين هما بيستلموا الطريق كله بس اكتر وقت بشوفهم قرب نزلة "اثر النبى" .. قالولى مش تبعنا دول تبع نجدة القاهرة .. هنخليهم يكلموكى .. كلمنى بتاع نجدة القاهرة قالى مكانك فين قلتله لا الكلام ده كان امبارح بس ده بيحصل تقريبا كل يوم .. قالولى امبارح وجاية تبلغى دلوقتى لما يحصل اتكلمى فى وقتها هنبعت حد من عندنا .. تانى يوم حصل كلمتهم وقتها حصل نفس الحوار ده تبع الجيزة لا ده تبع القاهرة وهكذا .. قالى هبعت حد . حاولت افهمه انهم محتاجين كمين لأن ده بقى شبه يومى وان اللى هيجى دلوقتى مش هيلاقى حاجة .. بس مفيش.
بقيت مضايقة جدا انى بشوفهم كل يوم تقريبا ومش عارفة اعمل حاجة .. كل يوم بشوف ناس بتتسرق قدامى ومش عارفة اعمل حاجة
النهاردة كلاكيت ٧ مرة شوفتهم بس المرادى ٣ موتسكلات كل واحد عليه اتنين .. من حظى او من حظهم وقفوا جنبى يقسموا بعض .. انا قررت اصورهم .. قلت احاول يمكن اعرف اعمل حاجة او اعمل فيهم بلاغ .. للاسف الفلاش كان شغال فاطبعا خدوا بالهم وخبوا وشهم .. واحد منهم نزلى .. مسك ازازتين من الارض ووقف جنب الشباك اللى جنبى .. "امسحى الصور احسنلك" .. بصيتلوا و دورت وشى .. حدف إزازة على الازاز اللى جنبى كسره .. وزعق تانى "امسحى الصور" .. طبعا كنت استفزيت .. بصيتلوا ورفعت تلفونى وحاولت اصوره تانى .. حدف التانية .. اتكسرت عليا جوه العربية وطلع ركب وجرى .. الطريق واقف محدش فكر ينزل حتى يطمن عليا بعد ما مشيوا.. رحت ناحية اليمين ومشيت شوية قابلت عربية دورية واقفة .. ملخص الحوار الدورية واقفة علشان اتوبيس سياحى معدى .. مش هيعرفوا يعملولى حاجة علشان معيش لا صور واضحة ولا ارقام للموتسكيلات .. بس نزلى باقى الازاز اللى كان فى الشباك علشان ميطرش عليا .. وعرض يمشى ورايا لحد النزلة بتاعتى .. شكرته وكملت طريقى.
وبس كده.
تعديل#١
شكرا لكل الناس اللى سألت عليا انا كويسة الحمدلله هى كدمة بسيطة فى ضهرى لما كنت بحاول افادى الازازة التانية و شكرا للناس اللى بتحاول توعى اللى يعرفوهم بال tag او ال share. وللناس اللى بتسألنى على الصور او على رقم الموتوسيكل للأسف الصور كلها مش واضحة و مهزوزة علشان كنت بحاول اصور بسرعة ونور العربيات اللى جاى فى وشى كان عالى قوى. والجزيرة اللى فى النص عالية لنص الموتوسيكل فا مش باين النمر.
تعديل#٢
فى ناس كتير بعتتلى فى كومنتات انه حصل معاهم نفس الكلام وفى ناس حاولت وعملت تحذير قبل كده وناس كانت عرفت تصورهم فعلا بعتتلى صورة ليهم .. انا هزود فى الصور كل الكلام ده. ..