صاحب واقعة الكشري: كل ما اتصل بأحمد العوضي يكنسل عليا.. ومفيش حد وقف معايا
قال "محمد" عامل النظافة صاحب واقعة الطرد من كشري التحرير: "محدش ساعدني وأحمد العوضي كل ما اتصل عليه يكنسل".
وأضاف أثناء ظهوره في برنامج "تفاصيل" المعروض عبر شاشة "صدى البلد2": "الأستاذ أحمد العوضي قالي هقف معاك في موضوع الرخصة، وقالي مشكلتك إيه؟، حتى الصحفي قاله هو مشكلته أنه دخل عامل نضافة عشان ميمدش إيده لحد، وعشان رخصته، راح هو قال لأ، مشكلتك دي هحلهالك، أنا معايا رخصة أولى، تاني حاجة قالي متشغلش دماغك، أنا هقف معاك وأعملهالك، بس الصراحة مفيش حد وقف معايا، عشان مكذبش، ودي الحقيقة يعني والصراحة ولحد دلوقتي".
وأضاف: "حتى لما بتصل بـموقع القاهرة 24 وأقوله اتواصل معاه أو كده، قالولي حاضر هنرد عليك، ومرة يكنسل ومرة ما يردش، الصراحة بقى مرضتيش أكلم حد، قولت بقى ربنا يقدر بأي شغلانة، أنا حاسس إني لوحدي دلوقتي، لكن مفيش حد ساعدني بحاجة، ومفيش حد إداني حاجة".
واستضاف الفنان أحمد العوضي، عامل النظافة، ونشر صورة له معه داخل أحد المطاعم، معلقاً عليها: "أخويا محمد الجدع".
وأضاف: "محمد هيستلم شغله بعد بكره سائق نقل (شغلته الأساسية) في مطعم أسماك".
وفي وقت سابق، انتشر مقطع فيديو على منصات التواصل الاجتماعي يظهر رفض إدارة فرع كشري التحرير جلوس أحد عمال النظافة داخل صالة المطعم، وهو ما لاقى انتقادات موسعة لهذا التصرف عبر السوشيال ميديا.
وفي شهر رمضان الماضي، شهدت سلسلة مطاعم كشري التحرير واقعة غريبة أيضا تمثلت في شكوى سيدة مسيحية تدعى سيلفيا بطرس والتي أوضحت منع مسؤولي المطعم لها من الأكل في الصالة قبل أذان المغرب.