عمرو أديب يناشد المواطنين بترشيد الاستهلاك: الناس شغالة بالدين

الموجز
توك شو
2022-06-25 23:16

الموجز    

أكد الإعلامي عمرو اديب أن الكثير في مصر والعالم يشعرون بوجود أزمة، مشيراً إلى أنها مشكلة ستظهر بشكل أكبر في الشهور القادمة، لافتاً إلى أن النقود كان لها قوة معينة في السابق ولكن الفترة الحالية أغلب الأشخاص يضطروا للاستلاف لتلبية رغباتهم واحتياجاتهم.

وقال أديب، خلال تقديم برنامجه "الحكاية" المذاع عبر فضائية "إم بي سي مصر" مساء السبت،: "فيه ناس بتستلف أكثر من مرة وفيه أشخاص بتقوم بالسلف بفوائد، بجانب كروت الائتمان".

وأضاف الإعلامي: "لو وصلت لمرحلة مفيش حد قادر يديك فلوس بتبدأ تبيع متعلقاتك الشخصية وهو ما يحدث تحت ضغط ونضطر لبيع الأشياء بأرخص من ثمنها الحقيقي".

وواصل: "بنلاقي بعد فترة عندك فوائد في البنوك وأقسام وديون، وأنا مش بعكنن عليكم أنا بنبه عليكم من بدري أنا مش بتاع فيديوهات أو خبطت أنا بقولكم اللي جاي، بقولك نهاية الحكاية، أنا مش بفهم في الاقتصاد ولكن عندي قدرة إني بشوف بره بيحصل ايه ورئيس الوزراء قالها إننا لازم نرشد الاستهلاك".

وتابع أديب: "في الخارج بدأ الحديث أن هناك بعض الأشياء بدأ يقل نسب بيعها بحوالي 30 او 35 %"، موضحًا، أن الفرد والعائلة هما الخلية الأولى في المجتمع، ولذلك لابد من التدبير والترشيد وهناك معادلة بسيطة أن الحاجة إذا حدث فيها زيادة بنسبة 25% نقلل استهلاكنا 25%، قائلًا: "أحيي الست اللي بترجع الحاجة لما تلاقيها غالية".

وأكمل عمرو أديب: "إمبارح شفت زحام غير طبيعي مطاعم في التجمع وأكتوبر بالحجز والضرب طب ايه انا فاهم غلط ؟! كل دا بالدين الناس شغالة بالدين وهييجي يوم مينفعش فيه كلام، وفي اللحظة دي ربنا معاك ومحدش بيقربلك"، موضحًا: "أرجوكم لو سمحتوا خدوا المسألة جد، والناس بتتمسك من رقبتها من الديون وأرجوكم وسعوا على الناس اللي حواليكم، والمنطقة العربية معروفة بالرحمة، ولكن المصريين يعشقوا الكمبيلات عشق كبير".

تعليقات القراء