أمير مرتضى منصور يتحدث عن كواليس توقيع أحمد الشناوي لـ الأهلي

الموجز  

كشف أمير مرتضى منصور، المشرف العام السابق على فريق الكرة الأول بنادي الزمالك، حقيقة إقامة شركة تسويق رياضي، ومشاركة وكلاء لاعبين، بالإضافة إلى كواليس توقيع أحمد الشناوي حارس الزمالك السابق للنادي الأهلي، وأفضل الصفقات التي تم التعاقد معها.

وفي حواره مع الإعلامية أميرة بدر ببرنامج "أسرار" المذاع عبر فضائية "النهار" مساء السبت، قال أمير مرتضى: "مسكت الزمالك في 2018 قبل كده كنت بشتغل للزمالك بطريقة غير رسمية، واتقال عليا أنا عندي شركة تسويق رياضي ولا عمري فتحت شركة ولا شاركت حد في شركة، وده نوع من أنواع الصراعات والخصومات اللي كنا بنتعرض ليها".

وأضاف المشرف العام السابق على فريق الكرة الأول بالزمالك: "أحمد يحيي وكيل لاعبين، وهو وكيل أهم لاعيبة في مصر، وهو وكيل شاطر لو أنا مشارك أحمد يحيي زي ما بيتقال هاقول أنا مشاركة عادي جدا، وبتعامل مع وكلاء لاعبين كتير، ورشحت طارق حامد والونش لنادي الزمالك قبل ما أكون موجود بشكل رسمي".

وتابع: "منعت أحمد يحيى من دخول نادي الزمالك لمدة سنتين، ومنعته من الدخول بسبب إنه خد أحمد الشناوي حارس الزمالك وقتها عشان يمضي للأهلي وعرفت الموضوع ده من المستشار تركي أل الشيخ، ولو فيه وكيل خدت منه جنيه واحد أو عزمني على حاجة تخص الشغل في الزمالك يطلع يقول أو يقدم فيا بلاغ".

وعن أفضل صفقة تعاقد معها، قال أمير مرتضى: "أحمد سيد زيزو اشتريته بـ 200 ألف دولار وكان وقتها الدولار بـ 15 جنيها، وماكنش معروف ساعتها لحد في مصر، بالإضافة إلى أشرف بن شرقي إتعاقدت معاه في صيف 2019 من الهلال السعودي بـ 400 ألف دولار، ومضي 3 مواسم، ولما قعدنا سنة في البيت والمجلس اتحل، كان أشرف بن شرقي فاضله 6 شهور وعقده ينتهي، واللاعب قالي أنا مش عايز أقعد في مصر، ولو قعدت في مصر هلعب في الزمالك، بس سيبني أمشي عشان خاطري، وبلاش تصرح للناس وتعشمهم إني ممكن أجدد".