أبو الليف يكشف كواليس أزمته مع نجل شقيقته أيمن بهجت قمر

الموجز    

كشف المطرب نادر أبو الليف تفاصيل خلافه مع نجل شقيقته الشاعر أيمن بهجت قمر، مشيرا إلى أنه أول من وضعه على طريق الفن.

وأوضح أبو الليف، في حواره مع الإعلامية إنجي هشام ببرنامج "المنسي" المذاع عبر فضائية "هي" مساء الثلاثاء،: "كنت عامل ألبوم اسمه سلف ودين، وده كان أول ألبوم للشاعر أيمن بهجت قمر، واللي بيقول أني معملتش نجاح بعد ما سبت أيمن بهجت قمر، أنا آسف ليه ولكن مش أيمن بهجت قمر اللي نجحني، ربنا اللي أنصفني لأنه عالم بحالي وتعبت وشقيت علشان أوصل لـ ده".

وأضاف المطرب: "أنا أول واحد دخلت أيمن بهجت قمر ستوديو، وأنا أول واحد شجعه يكتب أغاني، الكلام ده سنة 1995، هو قريبي وخدته معايا الاستوديو وفي شهود على الكلام ده، وفي إثباتات علشان أنا خاله وكان صعبان عليا إن والده توفى، الشاعر والسيناريست الكبير بهجت قمر، وهو ابن أختي وبدأ يقولي والنبي يا خالو خدني معاك ستوديو وأنا عايز أكتب أغاني وغنيلي أغنية".

وعن مساندته للشاعر أيمن بهجت قمر، أوضح أبو الليف: "خليت خالد سلامة الموزع يقعد معاه ويفهمه الدنيا، وخدت منه أغنية، وبعدين عملت معاه ألبوم كله سلف ودين، ودلوقتي علاقتنا اتقطعت خلاص وأنا الموضوع بالنسبة لي لا يعني لي شيء، لأن الرزق من عند ربنا مش العبد، فأنا مش من النوع اللي ممكن أخسر دمي علشان جنيه أو شغل، إحنا في دم بينا وقرابة حتى لو هو أنكر ده، أنا مديت له إيدي على أساس أنه ابن أختي، إن كان هو بيقول أن أنا مطرب أغاني هبطة، ولو قولت في حقه كلمة وحشة هبقى أنا كمان كده".

واختتم نادر أبو الليف تصريحاته بالقول: "أنا لقيته طالع في برنامج بيقول أنا اشتغلت في بداياتي مع ناس أشباح ومطرب أغاني هابطة، طيب مطرب الأغاني الهابطة ده، أنت كنت بتروح معاه الاستوديو تتحايل عليه ليه؟ كنت بتقوله والنبي يا خالو عايز اكتبلك أغنية ليه؟ كل واحد بيبان في الظروف، وربنا يهديه ويديه على قد ضميره ونيته".