بوسي عن طليقها الراحل وليد فطين: كان مسيطر عليّ بالسحر ومعيشنا معاه بالعافية

الموجز  

نفت المطربة بوسي، اتهام طليقها الراحل وليد فطين وشقيقتها لها "بأنها استغلته وأنه تسبب في ظهورها على الساحة الفنية."

وفي حوارها ببرنامج "العرافة" المذاع عبر فضائية "النهار" مساء الإثنين، قالت بوسي: "الناس بتقول ده كان المنتج وهو اللي عملها، أنا مش جاية لنصر محروس ولا محسن جابر، أنا اتعرفت عليه لأنه كان بيشغل نمر في شارع هرم، مكنش منتج ولا حاجة".

وأضافت المطربة: "كنت أعمل في الزقازيق ونصحوني هناك بالتعامل مع وليد فطين، قابلته على أساس إنه يمسك لي شغلي في شارع الهرم مش رايحة شارع الهرم، وقالي إنه كان مطلق أم ابنته التي كانت تعمل راقصة، لكنها تابت الآن وأصبحت منقبة وتربي ابنتها".

وتابعت: "كان ابن آدم طماع وقالوا له إني هبقى نجمة ولف عليا وتزوجني وعرف يوقعني لأني كنت عيلة صغيرة وكان عمري 19 سنة وياخد كل قرش مني، وأكبر دافع لقبولي الزواج منه هو رغبتي في الهروب من سيطرة خالي واستغلاله لي لأنه كان واخد كل شقايا، وعشان أهرب منه رحت للأسوأ منه".

كما نفت بوسي ما أتهمت به بشأن إبلاغ الشرطة عن طليقها وليد فطين، ومن ثم التسبب في حبسه، حيث قالت: “لو كنت عاوزة أبلغ عنه كنت عملتها من ساعة ما أذاني".

ولفتت المطربة الشعبية إلى أن طليقها الراحل تزوج عليها راقصة، موضحة: "اتجوز كتير بعدي واتجوز عليّ رقاصة واكتشفت الموضوع بسبب طمعه، اتجوز واحدة تانية عشان ياخد فلوسها، وهي راقصة ليست معروفة".

وأضافت: "لما كنت بشتغل معاه، مكنتش باخد غير 400 جنيه من النمرة رغم إن المفروض ليّ نسبة، وكان بياخد من ورايا فلوس كتير، وقتها كان أقل واحد بينقطني بـ5 آلاف جنيه، مثلا كان بيترمي عليّ حوالي 200 ألف جنيه في اليوم تقريبا كنت باخد منهم 400 جنيه، كنت بلا إرادة يعني بالسحر والأعمال وبالتالي وافقت، وأخته اللي كانت بتعمل السحر".

وأشارت إلى أن زوجها كان مدانا في قضايا نصب وتبديد منقولات، قائلة: "كان عليه شيكات ونصب على ناس وعليه تبديد عفش، كشفت عليه لقيته عليه 75 قضية".

وأوضحت بوسي أن زوجها أجبرها على توقيع إيصالات أمانة ليجبرها على أن تعيش معه، موضحة: "كملت معاه لأنه كان معيشني بالعافية وكان قافل عليّ من كل ناحية، لدرجة إني مكنتش عارفة أكلم محامي أرفع عليه قضية خلع، والسحر كان مكتفني ومضاني إيصالات أمانة عشان أعيش معاه، ومكنش عندي إرادة وكان قافل عليّ كل حاجة ومكنتش بتواصل مع عائلتي، ورفع عليّ 17 قضية وعشان يتنازل عن كل ده اتحكم عليّ في قعدة عرب بدفع 4 ملايين جنيه لهم، ودفعت أكثر من 4 ملايين جنيه".