«عكس ناس مابتقولش عشان خايفة من التريقة».. كاتب صحفي يوضح: «كيف أجبره محمد سامي على متابعة مسلسل نسل الأغراب؟»
الموجز
علّق الكاتب الصحفي محمد فتحي على مسلسل "نسل الأغراب" الذي يعرض حالياً خلال شهر رمضان المبارك، وهو من إخراج محمد سامي، وبطولة النجمين أحمد السقا وأمير كرارة.
وأشاد فتحي بحرفية المخرج محمد سامي في المجال الفني، وبطريقة تعامله مع الفنانين، وهو ما ظهر جلياً في مسلسل "نسل الأغراب"، بجانب استثماره في زوجته الفنانة مي عمر.
وكتب فتحي منشوراً عبر صفحته بموقع "فيس بوك" قال فيه: "عكس ناس كتير الحقيقة بتتابع ومابتقولش عشان خايفين من التريقة .. انا بتابع : نسل الأغراب .. واللي شايف قيه مخرج ليه أدواته مهما نصب ع المشاهد ومط ككاتب لنفس الورق اللي بيخرجه بس هو حريف ولعيب".
وأضاف الكاتب: "مهما شغل مي عمر بغير حق أحيانًا بس هي مشروعه اللي بيبني فيه وبيستثمر فيه وبيعملها براندينج بمنتهى الاخلاص ومصمم يخليها من نجمات الصف الاول وبيراهن عليها للدرجة اللي خلت شركة الانتاج تعملها مسلسل".
وأكد فتحي ان محمد سامي "مخرج بيدير ممثلينه كويس.. بيزودلهم ادوات يلعبوا بيها وتظهرهم بشكل مثير للجدل اللي هو بيبقى قاصده واسعد واحد بيه من وجهة نظري وبيعتبره معيار نجاح كمان".
وأوضح: "بيخلي السقا يركز في تفاصيل صغيرة ف حرفية الممثل ماكنش بيعملها قبل كده.. وبدل ما السقا يلاقي دعم لانه بيمثل أخيرًا بيلاقي سخرية من كتير ممطره بينما السقا تعب في دور زي ده عن اي مسلسل عمله ف حياته.. وأمير بيخرج من عباية دور احمد منسي اللي كان ممكن تدفنه كممثل رغم طهرها إنسانيًا وخلودها للأبد.. حتى الممثلين إللي بنشوفهم في شكل تاني زي منة فضالي وزي انعام الجريتلي الله يرحمها وزي عماد زيادة دول شهادة لسامي".
وأكمل فتحي: "محمد جمعة مكمل جمال مهما كان الدور ناقصه شوية الملح هو اللي بيزودهم وسامي عارف انه فاهم فسايبه وشايله لوقت الدراما فيه هتخليه يعمل حاجات متوقع انها تنقله نقلة تانية .. داش عمل الصعيدي احسن من مالك .. بس برضه المخرج التنك اللي جوة سامي الموهوب يخليه يبوظ الحاجات على نفس شوية الملح اللي عرف جمعة يزودهم فتبقى النتيجة مع داش ومالك انهم يبقوا إفيه".
وعن شقيقة المخرج محمد سامي، قال الكاتب الصحفي: "اخت محمد سامي عرف يوظفها صح .. رسملها كاركتر لطيف يضيع بيه ديفوهات تمثيلها زي ما عمل مع مي عمر نفسها في الاسطورة على امل انها تكسب خبرة مع كل تجربة تعملها، ويا بخت اللي يقتنع بيه سامي ويدعمه حتى لو كإن قريبه".
وعن الفنان دياب، قال: "بيفضل ممثل تقيل ماتحسش انه بيمثل في اي مشهد بيعمله ولو اشتغل مع مخرجين أمناء على موهبته زي سامي مبروك علينا ممثل بيكتب اسمه ف كشف ممثلين ميار عمره ما انتهى".
وقال فتحي: "نسل الاغراب دراما قابيل وهابيل العصر الحديث.. والعالم اللي عمله سامي بتفاصيله عالم اسطوري شوية وبعيد عن الواقع في بعض الاحيان وعكس منطق الصعايدة الجدعان اللي من رايي ان سامي مادرسهومش صح ولا عايشهم كبني ادم الا ان شطارة سامي بتغطي على بعض التفاصيل ساعات وبتدفعه للغرور ساعات تانية فبتطلع الدنيا صح اوي او فاكسة خالص وبيفضل محمد سامي موهوب محتاج يبقى عنده شوية ثبات انفعالي جنب جنونه اللذيذ عشان يعرف ان المحشي ماينفعش يتاكل في الصعيد بشوكه وعشان يرسم ككاتب الشخصيات لمنتهاها مش يقولنا تاريخها ويسيبها ترعى في الورق لوحدها بدون اطار درامي منطقي يخليها تتحرك صح .. احترامي لسامي المخرج الشاطر مش التاني.. والكاتب اللي عامل قصة لطيفة مش اللي نسي الملح ف حاجات كتير .. ولسة مكمل فرجة على نسل الاغراب".
ويعرض مسلسل "نسل الأغراب" على قناة ON الساعة 7.45 مساء، ويعاد الساعة 4.30 صباحًا، والساعة 2 عصرًا، بينما يعرض على قناة ON دراما الساعة 9 مساء ويعاد الساعة 10.15 صباحًا و3.30 عصراً.
"نسل الأغراب" من تأليف وإخراج محمد سامى بطولة كل من: أحمد السقا، أمير كرارة، مى عمر، دياب، عماد زيادة، فردوس عبد الحميد، دياب، نجلاء بدر، إدوارد، أحمد مالك، أحمد داش، منة فضالى، محمد مهران، محمد جمعة، ريم سامى، ملك أحمد زاهر، هدير عبدالناصر، سلوى عثمان، أحمد فهيم، إنعام الجريتلى، حمدى هيكل، أحمد ماجد، مروى الأزلى، بسنت السبقى.