إعلان لـ حمدي الوزير في شوارع مصر يثير ضجة واسعة على السوشيال ميديا.. ونشطاء: تمشي إزاي مع مراتك أو بنتك وشايف قدامك إعلان زي ده؟

الموجز  

تصدر الفنان حمدي الوزير قائمة الأكثر تداولا على منصة "إكس" للتواصل الاجتماعي وذلك بعد حملته الإعلانية الجديدة “ليك في الكيك”، والتي أثارت جدلًا واسعا على السوشيال ميديا، خاصة وأنه ظهر في الصورة بتعبير الوجه نفسه الذي اشتُهر به بعد تقديمه في فيلم "قبضة الهلالي".

ووجه رواد مواقع التواصل انتقادات حادة للفنان حمدي الوزير، حيث أكد البعض أن إعلانه الجديد مثير للجدل وصورته تشير إلى إيحاءات لها علاقة بالتحرش.

وأثار إعلان حمدي الوزير خاصة مع العبارة التي تضمنها التي قال نشطاء عنها إنها "تتضمن إيحاءات جنسية".

وتناول بعض النشطاء الإعلان بسخرية، حيث قالت متابعة: "المفروض إن ده إعلان.. الفكرة إني أول ما شفته لقيتني بقول: والله لو ليَّ ما كانش بقى ده حالي يا باشا.. هو العيب فيَّ وإلا في الإعلان".

وقال آخر: "حمدىيالوزير بيقول اللي انتقد الإعلان مرضى نفسيين! الحقيقة إن اللي عملوه متعمدين إثارة الجدل علشان الانتشار، الجملة لو اتقالت لوحدها أو مع أي صورة تانية كانت هتبقى عادية لكن مع صورة معروف أنها بترمز للتحرش يوجب المساءلة".

وعلق ناشط آخر: "الإعلان ده بيتقال عليه Dirty Marketing.. لو ما تعرفش يعني إيه! فهو نوع من أنواع التسويق اللي فيها إيحاءات جنسية أو التنمر، أو أي شيء يثير استفزاز العملاء لغرض عمل Awareness سريع ويبدأ الناس يدوروا عليه".

فيما تساءل متابع: "طيب تمشي إزاي مع مراتك أو بنتك وشايف قدامك إعلان زي كده؟ وصورة حمدي الوزير بتأكد نية مخترع الإعلان معقول احنا وصلنا للانحلال ده في شوارعنا".

وقال آخر: "تخيل كده لما تبقي ماشي انت وابنك في الشارع وتلاقي ابنك يسالك هو انت يا بابا ليك في الكيك ولا ملكش وما تعرفش ترد تقوله ايه ؟!.. احنا وصلنا لمرحلة قاع صفيحة الزبالة ومحدش يقولي يا عم بلاش سؤء نيه".

أول تعليق من الفنان

وعن ضجة التي أثارها الإعلان، قال الفنان حمدي الوزير إنه “لا يهتم بالانتقادات السلبية ويهتم فقط بالانتقادات الفنية".

وأكد "الوزير"، في تصريحات لموقع "فيتو"، أن صورته على الحملة الإعلانية “ليك في الكيك” لا تحمل أي إيحاءات تشير إلى التحرش أو الإساءة إلى المرأة.

وأضاف الفنان: “صورتي على الإعلان دي صورة عادية مش من فيلم خالص، ولحد دلوقتِ أنا ما شُفتش انتقادات على السوشيال ميديا عن الإعلان ومش بهتم بهذه الانتقادات، وكل الناس فسرت إني بتحارب، لكن أنا مش حاسبها كده خالص، لكن في ناس غريبة الصورة ما فيهاش أي حاجة وعادية جدًّا”.