أنا رجل بسيط زيكم.. السيسي: طول ما الناس في أحسن حال يبقى حلمي ماشى في طريقه
قال الرئيس عبد الفتاح السيسى إنه طالما الناس فى أحسن حال يبقى حلمى ماشى فى طريقه.
وأضاف الرئيس السيسى، خلال حوار مفتوح مع أهالى الأسمرات: "حلمى لم ينته، وأتمنى أرى كل المصريين وهما في أحسن حال".
ووجه الرئيس السيسى رسالة للطفل يوسف عبدالله، أحد طلاب مبادرة جيل جديد: "كنت بمشى بشوف مناطق صعبة وأنا إنسان عادى زيك كده، وكنت أقول لو إيدى طالت هعمل، وده كان حلم وربنا أراد".
ورد الرئيس عبد الفتاح السيسى على إحدى السيدات وتدعى نعمة من أهالى الأسمرات: "المفروض ولادنا ما يشوفوش فينا تعبير مش جميل وحتى لما نلاقى عمل فى الدراما المفروض نتكلم ونحسن من كلامنا ومن سلوكنا ومحتاجين نراقب نفسنا يعنى حسيب رقيب والنهاردة يوم جميل بيكم كلكم وأنا فى وسطكم فى نعمة كبيرة".
وتابع: "دائما بقول للمسئولين عاوزين نعمل برامج مخلصة علشان انتوا أهلنا وأنا بتشرف أن أنتم أهلى وأنا راجل بسيط زيكم والبركة فى ربنا والشكر دايما موصول لله وهو اللى قدرنا نعمل ده".
وأكد الرئيس السيسي: "بنقول لربنا شكرا لو حد فينا مش بيقرأ ويكتب ما نستخسرش نعلمه لو حد فينا بيستغل لازم يعلم اللى مش بيعرف مش عاوزين حد بينا فقير طول ما القلوب مع بعض ربنا هيساعد بأفكار ودعم، وربنا يقدرنا على كل حاجة جميلة واللى اتعمل مش بيا لوحدى بينا كلنا وكل المسئولين لهم دور فى هذا وبقولهم متشكرين ونشتغل أكثر".