السيسي يتحدث عن مصادر تمويل بناء العاصمة الإدارية

الموجز   

كشف الرئيس عبدالفتاح السيسي، عن مصادر تمويل العاصمة الإدارية الجديدة.

وقال الرئيس السيسي، خلال مشاركته في القمة العالمية للحكومات بأبو ظبي، اليوم الاثنين،: "موازنة الحكومة لا تتحمل بناء المدن الجديدة، والنهارده لو حسبت متر الأرض في العاصمة بـ100 جنيه هيبقى المساحة كلها 70 مليارا، ولو حسبته بـ1000 هيبقى 700 مليار، ولو حسبت المتر بـ10 آلاف هيبقى 7 تريليون، الفكرة ازاى تحول المتر من 100 جنيه لمتر بـ10 آلاف جنيه، وأنت عندك نمو سكاني، وفيه طلب وكل سنة بيتجوز من 700 إلى 800 ألف شاب وفتاة سنويا، يعني بتتكلم في عدد من الوحدات السكنية بعيدة عن الريف، حوالي 400 ألف أو 500 ألف شقة سنويا، طيب أعملهم في القاهرة الزحمة ولا في الإسكندرية الزحمة؟، ولا في أي محافظة ولا اطلع بره؟، ولما طلعت بره احنا من خلال الأرض التي أعيد تسعيرها بالفكرة بأنها بقت العاصمة فبقى المطور العقاري عايز يدخل، وأنا اشتغلت مطور استراتيجي في الـ24 مدينة بفلوس الأرض دي".

وعن كيفية بناء الإنسان، قال الرئيس: "هناك تحد لجودتي التعليم والصحة، مع فرص العمل جميعا تحدث التنمية البشرية، والإنسان الذي نتحدث عنه ينتج بعد القيام ببرنامج كبير جدا، وما آجي اعمل مسار تعليمي جديد أو مسار تعليمي متطور نتايجه تيجي بعد 14 سنة بعد إطلاقه، عبر خطة طويلة الأمد".