غليتوا العلف ليه يا أحمد؟.. السيسي يمازح صاحب مصنع أعلاف بسوهاج
مازح الرئيس عبدالفتاح السيسى، أحمد عنتر صاحب مصنع أعلاف بالمنطقة الصناعية غرب جرجا بمحافظة سوهاج، قائلا: "غليتوا العلف ليه يا أحمد؟ وكرتونة البيض غليت"، ليرد "عنتر بقوله:" العلف عندى رخيص.. وأنا شغال علاف مواشى وتسمين".
واصل السيسى حديثه لصاحب مصنع الأعلاف خلال افتتاح عدد من المشروعات التنموية بسوهاج: " الدنيا ماشية معاك كويس؟.. أنا شايف عصافير كتير جوه المصنع" ليرد أحمد قائلا: " أنا مصدر الطيور".
وقال الرئيس لصاحب المصنع: ربنا يوفقك.. كلمنى أنا وملكش دعوة باللى بيكلمك.. واستسفر الرئيس عن عدد العمال ومرتباتهم، قائلا: "كام واحد شغال معاك؟ وبتدي مرتبات قد إيه؟.. ليجاوب أحمد: "25 عامل يا ريس.. والمرتبات من 3500 آلى 7 آلاف، كاشفا عن إنتاج نحو 5 أطنان من العلف فى الساعة الواحدة".
وأكد الرئيس عبد الفتاح السيسي، جاهزية دعم المشروعات الشبابية المختلفة، قائلا: "احنا جاهزين.. الأرقام اللى مش تحلموا بيها ومش من جيب الحكومة.. طب ليه.. لأنى مرتب ترتيبات تانية.. الحكومة يعني الدكتور مصطفي مش يزعل مني الحكومة مطحونة جدا".
وأضاف الرئيس السيسي، خلال كلمته في افتتاح مشروعات قومية جديدة في محافظة سوهاج: "الدكتور مصطفي النهارة اتكلم عن محافظة واحدة "سوهاج".. نصف اللى اتعمل بحياة كريمة ونص من غير حياة كريمة.. بنتكلم عن 7 تريليونات جنيه.. طب الـ 7 تريليون رقم متواضع قدام الحلم.. انا جاي بالطريق والطيارة وشايف .. لسه بدري اوي اوي اوي.. أنا بتكلم بجد.. لسه بدري".
وقال الرئيس، إن الدولة المصرية تحتاج إلى 70 تريليون جنيه وليس 7 تريليونات جنيه استثمارات لتنفيذ مشروعات لخدمة الناس، معقبا: "يا رب يعلمنا ويفهمنا وإننا نشوف.. واللي نشوفه نفهمه".
وعن استراتيجية تنمية الصعيد، أوضح السيسي: "اللي إحنا بنعمله في سوهاج أكثر من 100 مليار جنيه، ولكن اللي اتعمل تشغيله بكام؟ يعني عملت مكتب بريد.. الناس اللي هتشتغل فيه هتاخد كام؟ وهيتعمله صيانة بكام؟ ولو عملت مدرسة علشان تحافظ عليها هتصرف كام؟ وكذلك لو عملت مستشفى هتشتغل كل يوم بكام؟ وكل شهر وكل سنة؟ انت داخل في سباق.. مثلا عدد الفصول الموجود دلوقتي أقل من المطلوب بمنتهى البساطة، يبقى انت الأول عايز تسد الفجوة فجوة الموجود مع المفروض يكون موجود".
وأكمل الرئيس السيسي: "نحن في حاجة لـ60 ألف فصل بالمدارس سنويا، ولو النهارده عايز أعمل 60 ألف فصل يعني عايز 60 مليار جنيه، ثم أضع معهم مصاريف المدرسة والطقم الإداري والإشراف في المدرسة يعني بكام؟ أنا كنت براجع أمس مع الإسكان علشان أعمل 200 ألف وحدة تانيين.. لقيت الوحدة معدية عليا الـ700 ألف جنيه.. يعني ال200 ألف بـ140 مليار جنيه".