السيسي: لازم أكون متوازن وغيري أكِّل وشرَّب وساب البلد على الحديدة

قال الرئيس عبد الفتاح السيسي، إنه يعمل على مختلف القطاعات بشكل متوازي، حتى تتحقق النتائج المطلوبة.

وأوضح خلال الجلسة الختامية للمؤتمر الاقتصادي مصر- 2022، اليوم الثلاثاء: "الحاجة وخمسين ألف مدرسة دول، مفيش جنب المدرسة شباب يدخل ويساعد وزير التعليم، ويخش مع المجموعة ويساعد، ماهي المرتبات تعبانة، أيوة تعبانة، والله العظيم باكلمكم من قلبي، أقل من 10 آلاف جنيه لأي حد، مايعيش، هتقولي طب انت بتعمل ميناء بـ40 مليار جنيه.. لازم أكون متوازن، غيري أكل وشرب وسابها على الحديدة، المسار الحالي أكبر من أي حد، لازم أشتغل على كل قطاعات الدولة، حد يقول لي مهتم بالحديد والأسمنت، طب والبشر؟ مهتم بكله".

وأضاف السيسي: "التقيت بكتير من الناس الاقتصاديين، تحبوا تييجوا تمسكوا الوزراة، قالوا لأ، احنا لينا تاريخ، أنا مش بالوم حد، قالوا احنا مش هانقدر، حد تاني قال هاتديني كام، أنا باخد مليون واتنين في الشهر، قُلت له ماقدرش، قالي سيبني في مجالي لو فيه نصيحة هاقول لك".

عايزين نشوف زي بعض، باختلاف، قُل لي وجهة نظرك، أنا حلِّيت مشكلة الموانئ، أنا ماعنديش وقت أتأخر أكتر من كده، ماعنديش مهلة 10 سنين عشان الناس تييجي، اللي أعرف أعمله، أعمل أنا، طب بقت موجودة، اللي عايز يتفضل، لكل الناس بما فيها شركات الجيش، طب شركات الدولة مطروحة، طب مش بتعتبروا ده فرصة، والله أنا صادق معاكم، كل شركات الدولة معاكم، بس ماتجيش تقول لي نفض لي منها العمالة الزايدة واديهالي، طب إزاي يعني؟! لما تعمل شركة قطاع خاص بتنقي ناسك، اللي حصل ده ميراث، إوعى تخلي غضبك من سوء الأداء يتحول لعداء مع اللي بيعمل سوء الأداء، إوعى تكره الفقير.

وقال رئيس الجمهورية: لما عملنا الشقق، حَد يصدق إن الناس دفعت في الأسمرات والبشائر.. دفعوا ولا لأ؟ وزميلي اللي موجود في المحافظة مش واخد باله، طب أنا ساعتها أكفر بالفكرة ومش هاعمل كده تاني؟ لأ، أنا لازم أعرف هو ليه كده وأساعده مايبقاش كده، وماكرهش سلوكيات الفقر، وأكره الفقر نفسه وأغيره، أغيره ولا نغيره؟