الأزمة قد تطول.. السيسي للمحافظين: الناس من حقها تكسب لكن بالمعقول.. ولابد من التواجد في الشارع لضبط الأسعار

الموجز   

تفقد الرئيس عبد الفتاح السيسي، اليوم الثلاثاء، مركز عمليات التحكم والمتابعة للشبكة الوطنية للطوارئ والسلامة العامة، وناقش محافظى بورسعيد والسويس وجنوب سيناء والأقصر في سير الأعمال.

وأكد الرئيس السيسي على ضرورة متابعة حركة الأسواق والتأكد من توافر كافة السلع بأسعار مناسبة مع التأكيد على التواصل المباشر مع المواطنين بما ينعكس على استقرار الأسعار.

وقال الرئيس السيسي: "في البداية أهنيكم على الشبكة، فهذه نقلة حقيقية في قدرتنا على أن أحنا كدولة نرى جيدا الأوضاع على الأرض، وهذا أمر الحقيقة يدعونا للفخر".

ووجه الرئيس السيسي حديثه لمحافظ بورسعيد اللواء عادل الغضبان، قائلاً: "أنا عاوز أطمن على موقف توافر السلع والخضروات عندك في الأسواق دلوقتي ايه؟ وأنا مش بتكلم هنا بس في الوفرة يا عادل أنا بتكلم هنا في الأسعار يا عادل، أحنا بنقول للناس من حقها إنها تكسب بس أنا عاوز أقول في ظل الظروف اللي أحنا فيها نتكلم عن مكسب معقول عشان ميبقاش عبء على المواطنين في ظل الظروف الصعبة اللي احنا موجودين فيها، ودا أمر مهم".

وطالب الرئيس المحافظين بالتواجد فى الشارع مع المواطنين لضبط الأسعار، مؤكداً "دي القضية اللي محتاجين نضغط فيها دلوقتي، وبقول الكلام دا لكل السادة المحافظين، أبقى أنا متواجد بالفعل في الميادين والأسواق الرئيسية"

ووجه الرئيس السيسي حديثه للمحافظين: "نحن نحتاج الآن أن نبقى متواجدين على الأرض بنسب كبيرة أوي، فمشكلة المواطنين توجه لنا إحنا كمسؤولين، وعلينا أن نسمع منهم، لأنهم هيقولوا لمين غير لينا، بالتالي نبقى إحنا نبضهم في الشارع، ونبقى شايفين الدنيا عاملة إزاي."

وأضاف الرئيس: "احنا كدولة نتحرك عشان نعمل تعزيز للمنتجات الموجودة وطول ما فيه وفرة، طول ما فيه فرصة الأسعار تبقى مظبوطة."

وتابع: "أنا لا أتحدث عن تواجد السلع سواء أساسية أو غير أساسية من عدمه، ولكن بتكلم في التكلفة، وزي ما قلت لمحافظ بورسعيد، الأزمة الموجودة في الخارج قد تطول، وأثارها هتبقى موجودة معانا، ولازم نبقى شايفين ده ونتعامل معه، مش على قد أنه توفر دلوقتي أو تظبط الأسعار دلوقتي، وعاوزين يبقى عندنا تصور دلوقتي وفي الشهور القادمة، وتظبط الأسعار دلوقتي والشهور القادمة، لأن هذا عبء على الناس، لما المواطن يبقى جنب منه في الشارع يقول دا شايفني وحاسس بي، أنا بقول الكلام دا لكل الناس."