مشيدا بمشروع زيادة تخزين القمح.. السيسي: كل حاجة متوفرة واعملوا اللي عايزينه في رمضان.. والجيش بيوفر سلع بنصف السعر

أكد الرئيس عبد الفتاح السيسي توافر كل السلع الأساسية تزامنا مع اقتراب شهر رمضان الكريم، قائلا: "احنا داخلين على الشهر الكريم.. انتوا حرين اعملوا اللى انتوا عاوزينه.. كل حاجة متوفرة".

وشدد الرئيس عبد الفتاح السيسي، على توافر كل السلع الأساسية داخل الدولة المصرية، قائلآ: "مفيش مشكلة بفضل ربنا في أي سلعة أساسية.. حاجتنا موجودة وزيادة وده فضل ربنا علينا.. وجهد الدولة وجهدكم.. موضوع الصوامع مثال.. مستودعات البوتاجاز.. كل دورة شتاء مفيش مكان.. الموانئ مش قادرة تستقبل السفن المحملة وكان الدورة أيام فقط ودلوقتي بقيت شهرين".

وأضاف الرئيس السيسي، خلال كلمته في حفل تكريم المرأة المصرية والأم المثالية: "ده اتعمل في ملف مستودعات البوتوجاز.. وكمان تم التطوير في مستودعات للزيوت المستخدمة في طهى العام.. خلاصة الكلام.. كنا محتاجين نتعامل في تحديات ومطالب الدولة بما يتطلب من الحلول العلمية المخططة اللى بتطلبها الدولة".

وتابع الرئيس السيسي: "يعنى ايه دولة فيها 100 مليون.. ده مش حاجة بسيطة.. تنظيم حياة الناس دى من أول السفينة اللى بتجيب القمح لحد رغيف العيش يوصل إليها.. ده على مستوى مصر.. طب في العالم فيه مشكلة كبيرة جدا في سلاسل التوريد نتيجة الازمة الكبيرة اللى الكل متابعها حاليا.. ولها تأثيرات اقتصادية على سعر البترول.. كنا بنتكلم في سعر البرميل من 60- 70 دولار.. دلوقتي سعر البرميل بنتكلم في 115 -120 دولار.. ونتمنى أن الأزمة دى تنتهي سريعا حتى لا يحدث قفزات أخري".

وأكد الرئيس عبد الفتاح السيسي، أنه لا يوجد أى مشكلة فى السلع داخل مصر حاليا أو خلال شهر رمضان، متابعا: "لسه الجيش منزل 2 مليون كرتونة.. وممكن ينزل 2 مليون أو 3 ملايين أو 10 أو 20".

وأضاف الرئيس السيسي: "احنا عاملين حسابنا لكل حاجة"، موجها حديثه لوزير الدفاع: "الكراتين دى مش بنص التمن.. بلاش نكسب.. نص التمن بس.. مفيش عندنا مشكلة خالص".

وتابع الرئيس: "إذا كنتم عاوزين مستقبل أفضل وحياة أحسن لازم نراجع الكلام ده.. يادوبك.. يادوبك".

وتحدث الرئيس عبد الفتاح السيسي عن دور المشروعات القومية الكبرى التي نفذها الدولة المصرية خلال الفترة الماضية، قائلا: "نقاش كتير دائما موجود.. يا تري احنا موجودين والشغل ده.. هل كان له أثار إيجابية ولا كان أثار صعبة.. هقولكم على حاجة.. أحد المشروعات البسيطة جدا.. مشروع قومى لزيادة حجم القدرة على تخزين القمح.. بقي عندنا القدرة على تخزين 5.5 مليون طن قمح.. كان اللى موجود تلت الرقم ده قبل كده.. كان بيعمل ايه.. حطينا فلوس كتير في الموضوع ده.. لقينا تمن اللى بيفقد 20 % من القمح".

وأضاف الرئيس السيسي: "احنا في مصر نقدر نقول بنتداول ما يقرب من 17 -18 مليون طن.. بنتداول 15 مليون أو 10 مليون طن.. كان فيه منهم 2 مليون طن قمح يفقدوا.. طب دول تمنهم كام ويفقدوا ازاى.. في شون مكشوفة.. وفى مخازن مفتوحة.. ويتعرضوا للفقد.. لما عملنهم وعندنا مخزون القمح 4 شهور".