معلقا على قضايا الطلاق وانتحار فتاتين.. السيسي: لما الراجل يكلم الست يحط إيده ورا ظهره.. واحترام المرأة التزام سياسي وليس منحة

قال الرئيس عبد الفتاح السيسي، إن المرأة المصرية العظيمة تدعم وما زالت دعما وظهيرا لوطنها، مشددا على أن قوة المرأة المصرية هي التي صنعت مجد هذا الوطن.

وأضاف الرئيس خلال احتفالية المرأة المصرية:" المرأة رمز العطاء والتفاني والتضحية المتجردة من أى مصلحة، فهي سر الحياة وأقولها صريحة أن انحيازى للمرأة المصرية هو عن قناعة تامة وإيمان حقيقي بان احترام المرأة وحمايتها وتمكينها واجب وطني والتزام سياسى، وليس هبة أو منحة، بل حق أساسي لها وعلينا جميعا ان نتخذه منهج حياه فبدون ذلك لن يتحقق أى نجاح منشود".

وأكد الرئيس عبد الفتاح السيسي، إن توفيق الله سبحانه وتعالى السبب الرئيسي في تحقيق نجاح قرارات الإصلاح الاقتصادي، مضيفا: " الناس ممكن تاخد قرارات كتير لكن يبقى في النهاية توفيق ربنا ودعمه للقرار هو ده الأساس والناس مستعدية تاخد قرارات طول الوقت لكن لما ربنا يوفق والناس تساعد معانا، الناس ساعدت، بتكلم على ست البيت اللى هي مطلوب منها تاكل وتشرب وتلبس هي اللى ساعدت مع الوطن، ولما أسجل ده وأقوله أنا واحد من الناس متعتبرونيش مسؤول كبير ولا حاجة".

وتابع:" أنا واحد من المجتمع بسمع وأشوف الست بتعمل إيه؟ زى كل بيت من بيوتنا، واللى بيحصل فيها تجد في الاخر الست هي اللى بتشيل بقول بإنصاف.. بتكلم في حالة مش استثناء.

وواصل الرئيس: "بجيب ألف ست ومشكلة في كل بيت مش بقول ان كل الاف 100 % لكن نسبة كبيرة منهم تضحى وتعطى وتساهم اكتر من 80 % يتبقى استثناء ميتحسبش عليه.. عاوز أقول حالة النجاح التي تحققت خلال السنين اللى فاتت، وقسوة الإرهاب والتضحبات اللى اتقدمت فيه أباء بيتالموا لكن الام والبنت والزوجة مش هقول الجناح الضعيف لكن الجناح هي اللى أتألم.

وشدد الرئيس عبد الفتاح السيسي، على أن المرأة كانت سببا كبيرا وأصيلا لحالة النجاح اللى احنا بنعيشها ومكونتش ببالغ، خلال الأحداث اللى في العشر سنين اللى فاتت كانت المرأة محركة وصانعة للأحداث.

وأضاف: "لما جينا في برنامج الإصلاح الاقتصادى وبدعمها مررنا ظروف قاسية مرت على الوطن والشعب المصري كله بدعمها ومساندتها، ولولا هذا الدعم، الراجل موجود محدش يفهمني غلط ما أنا راجل برضه.. لكن افتكروا المرأة، افتكروا بإنصاف، أى زوج يفتكر بإنصاف زوجته بتعمل إيه؟، يتفكر كل ابن بإنصاف والدته بتعمل إيه ؟، هنجد أنها أعطت كثيرا جدا".

وعلق الرئيس عبدالفتاح السيسي على قضية الإيذاء البدني للسيدات قائلا: "قلتلكم مرة فى موضوع الإيذاء البدنى.. قلت لما الراجل يكلم الست يحط إيده ورا ظهره ويتكلم كويس .. لما النبى محمد صلى الله عليه وسلم  قال "استوصوا بالنساء خيرا".. دي استراتيجية يا جماعة تطلع منها عادات وقيم ومبادئ ودراسات تحقق هذا الأمر.. ومناهج فيها احترام وأدب وذوق وخلق مع المرأة".

كما علق الرئيس، على حادثة انتحار فتاتين بسبب فبركة صور لهما.

وقال الرئيس السيسي: "تابعت من شهر أو أكتر حادثتين انتحار لبنتين علشان حد فبرك.. المجتمع ينتبه لولاده وبناته ويخلى باله إن أرواح الأبرياء دي في رقابنا، والدراما تنتبه لما تجيب ده في أى مسلسل أو فيلم.. وده مش ضد الإبداع انك تشيد بالحسن.. انت مش عارف تعمل إبداع إلا لما تجيب راجل يضرب مراته أو حد يشتم؟.. حتى لو ده موجود يبقا مرة لكن مش كل مرة".

وأضاف الرئيس السيسي: "لما يجي حدد يقولى أضرب!! تضرب إيه؟ ده كلام يجوز؟ ميصحش إن حتى حد في الشارع يؤلم سيدة ماشية بنظرة مش بكلمة.. ده كلام عجيب.. ده لازم المجتمع يتوقف أمام هذه النقاط.

تطرق الرئيس عبد الفتاح السيسي لقضية دور الرعاية، قائلا: "بقول لوزيرة التضامن مهما عملنا في دور الرعاية أفضل؟، ولا الناس دي تكون موجودة مع أسر، قالت لا طبعا، ومهما كانت قدراتنا لن نستطيع أن نقدم رعاية مثل الأسر وييسرنا الشروط اللى كانت موجودة في ها الأمر، ومش عاوزين حد عندنا يبقا مكسور الخاطر والظروف كسرته".

وأوضح الرئيس السيسي: "بنتيح برامج لأسر يكون عندها استعداد للعمل الطيب ده، مش إن الدولة مش عاوزة تقوم بدورها أو تتجاوزه لا، لكن تقديرنا بدراسات علماء الاجتماع والنفس إن الأفضل يكون الطفل والطفلة ينشئ وسط أسرة".

وحول قضايا الطلاق، قال الرئيس: "موضوع الطلاق، عاوز أقول يا ترى احنا كأسر هان علينا عيالنا وأطفالنا بين الراجل والست، هو يقف على موقفه وهي تقف على موقفها بغض النظر عن الموقف صح ولا غلط؟، لكن ده مش تمن مستحق يدفع من جانب الأسرة دى لصالح الابن والابنة، وأتصور ده تمن مش كبير قوى إن نتجاوز نفسى شوية، راجل كان أو ست، من أجل توفير لابني وبنتى بيئة مستقرة راضى مرضى يا ترى ده تمن كبير قوى.

وجه الرئيس عبدالفتاح السيسي، الحكومة، باتخاذ عدد من الإصلاحات والتشريعات والقانونية، لتعزيز مكانة المرأة وتمكينها وحمايتها، عرفانا بدورها الفاعل في بناء المجتمع.

تضمنت التوجيهات الآتي:

• تحديد إطار داعم لتمكين المرأة في سوق العمل وتحفيز التمييز الحكومى والمؤسسي في هذا المجال.

• دعم المرأة من أجل التحاقها بوظائف المستقبل، من خلال رفع الوعى لدى الاناث بأهمية ومزايا اتخاذ مسارات مهنية في المجالات الهندسية والعلمية والهندسية والتطبيقية وتهيئة فرص التعلم والتطبيق حول هذه المجالات للفتيات في مراحل الدراسية المختلفة.

• مواجهة جميع أشكال التحرش والعنف والمضايقات والاستغلال وإساءة استغلال السلطة في أماكن العمل.

• الحماية من الايذاء البدني في نطاق الأسرة صونا لكرامة المرأة ومكانتها.

وشهد الرئيس عبد الفتاح السيسي والسيدة قرينته انتصار السيسي حفل تكريم المرأة المصرية والأم المثالية 2022، اليوم الأربعاء.

وفور وصوله إلى قاعة الاحتفال، حيا الرئيس السيسي الحضور.

حضر الاحتفالية رئيس مجلس الوزراء الدكتور مصطفى مدبولي، ووزيرة التخطيط والتنمية الاقتصادية الدكتورة هالة السعيد، ووزيرة التضامن الاجتماعي الدكتورة نيفين القباج، وعدد من الوزراء وكبار رجال الدولة.