’’كان نفسك تطلع إيه؟.. وأفضل شخصية تاريخية وأصعب لحظة في حياتك؟‘‘.. الرئيس يجيب على أسئلة أصحاب الهمم

كتب: ضياء السقا

شارك الرئيس عبد الفتاح السيسى، في احتفالية "قادرون باختلاف" لأصحاب الهمم وذوى القدرات الخاصة، والتي أقيمت في مركز المنارة للمؤتمرات الدولية بالتجمع الخامس.

وأجاب الرئيس على أسئلة أصحاب الهمم، معبرا عن سعادته بوجوده بينهم.

ورد الرئيس السيسي على سؤال الفتاة أيه شلتوت بطلة ألعاب قوى، عن أكتر شخصية تاريخية يحبها؟"، قائلا: "النبى محمد صلى الله عليه وسلم وأصحابه اللى هما كانوا مثل جميل للإسلام والمسلمين".

وأضاف الرئيس السيسى خلال احتفالية قادرون باختلاف: "احنا الحقيقة واللى حصل خلال السنين اللى فاتت مكوناش مثل جميل للإسلام والمسلمين، الإرهاب والتشدد والتطرف".

وواصل الرئيس: "أصحاب النبى كانوا رحماء طيبين فاهمين قادرين، لكن احنا مش كده.. المؤذيين واللى بيؤذوا الناس.. عداوة.. عمرى مكونت عدو لحد، لكن بكره التطرف والتشدد كفكرة والغلو كفكرة لأنها بتدى قبح شديد لانسانيتنا، علشان كده بعتبر سيدنا محمد واصحابه قدوة هائلة".

كما أجرى البطل علي أحمد بطل الجمهورية فى ألعاب القوى والحاصل على 49 ميدالية مختلفة، محادثة مع الرئيس عبدالفتاح السيسي، خلال احتفالية قادرون باختلاف، وسأل الرئيس عبدالفتاح السيسي، عن أصعب وأسعد لحظة في حياته.

ورد الرئيس السيسي قائلا: "أصعب لحظة اللى حسيت فيها إن بلدنا ممكن تروح، ويا علي أحيانا يكون فهمك مش كده يعذبك لو انت بتفهم وتعرف قوى ممكن تتعذب قوي لانك هتشوف حاجات محدش هيعرفها غيرك، أصعب لحظة طب ليه خفت، خفت على ناسي وأهلى وكل الناس اللى موجودة في مصر عددنا كبير وظروفنا صعبة فلو البلد راحت الناس دي هتروح فين؟.

وعن أسعد لحظة قال الرئيس: "لسه مجتش، هو الحلم اللى أنا بحلمه لبلدي برضه، بيكم وبمصر والمصريين والشباب والكبار وبقادرون باختلاف اللى بعول بيهم أمام الله وبقسم بيهم أمام الله أنه يساعدنا".

من جانبها، تحدثت الطالبة نورهان، أول بطلة تزلج على الجليد ولاعبة سلة وعارضة أزياء ومن القادرين باختلاف، مع الرئيس عبد الفتاح السيسي، قائلة: "منورة يا سيادة الرئيس.. وسؤالى إيه أكثر أمنية شخصية؟.. وإيه أكثر أمنية تتمنى لها للبلد". 

ورد عليها الرئيس، قائلا: "أمنيتي الشخصية أن ربنا يرضى عنى.. دى أمنية عزيزة أوى.. ربنا عظيم السماوات والأرض.. صاحب الكون كله.. صاحب الملك كله.. يرضى عنى.. ياريت.. دى الأمنية الشخصية".

وتابع الرئيس السيسي: "أنا بحلم لبلدى.. وبحلم بيها.. وإحنا مشينا خطوة من ألف.. فاضل خطوة من ألف يعلمها المصريين".

وقالت الطالبة نورهان إن أمنيتها الشخصية: "نفسى أكون مذيعة ممثلة وعارضة أزياء.. محدش يقول ذوى إعاقة.. إحنا القادرون باختلاف ونفسى أكون ممثلة"، ليرد عليها الرئيس السيسي: "أستاذ أشرف عبد الباقى عنده مسرح كتير.. طب يلا بقى.. ونشوف حاجة لنورهان".

وسألت الطفلة بسملة الرئيس السيسي، حضرتك بتعرف تسوق طيارة؟، فمازحها الرئيس انتى غاوية موضوع الطيارة ده فعلا.. هطلب من وزير الدفاع أنك تركبي طيارة ثنائي مع أحد الطيارين، وهنصورك ونطلعك ونورى الناس وهى في الطيارة، وعلق الرئيس: البركة والرحمة موجودين معانا النهاردة".

وقالت الطفلة: حضرتك وأنت صغير كان نفسك تطلع إيه"، فرد الرئيس: كان نفسى أطلع طيار، ودخلت الكلية الجوية سنة 70 لكن محصلش نصيب".

تعليقات القراء