الرئيس: والدتى كانت شديدة الحكمة والصبر.. وطفلة من أصحاب الهمم للسيسي: كان نفسك تطلع إيه؟.. والرئيس يرد

الموجز

تحدثت الطفلة ملك محمد 9 سنوات بطلة مصر في السباحة في نادى الشمس، خلال احتفالية قادرون باختلاف، مع الرئيس عبد الفتاح السيسي، قائلة: "مين مثلك الأعلى"، ليرد عليها الرئيس السيسي قائلا: "دائما الناس فى السؤال ده بتقول أشخاص.. أنا عندى نماذج كتير من الناس.. مخدتش حد لوحده يكون مثلى الأعلى.. أول من تأثرت بيهم وكانوا نموذج.. أسرتى اللى عشت معاهم.. والدى والدتى.. والدتى كانت شديدة الحكمة والصبر.. ومش عاوز أكون منحاز وأقول مش شوفت نموذج مثل ده.. والدتى عملتنى التجرد.. يعنى أنى أشوف الأمور بمعيار بعيد عن الهوى والانحياز والتمييز، احكم عليها وأوزنها بالتجرد.. ومالقتش أعز منها ولا أكرمم منها.. الله يرحمها".

وأضاف الرئيس السيسي، خلال كلمته في احتفالية "قادرون باختلاف": والدى كان شديد الهمة وفضل يعمل من الفجر لغاية 12 بالليل.. وكان ميسور الحال ولكنه شديد الهمة ويحب العمل.. وخدت دى منه.. وكان لى عم شديد الكرم والرفق بالناس.. لم أرى فى حياتى نموذج كريم جدا مع الأطفال والضعاف.. ده عمى.. أنا مش خدت نموذج واحد.. والنماذج دى طيبة أتمنى من الله يجازيهم خيرا ويرحمهم".

قال الرئيس عبدالفتاح السيسي، إنه يشعر بالتقصير فى التواصل مع أسرته وأصحابه بسبب ظروف الوظيفة، ورد الرئيس على سؤال بسملة من ذوى الهمم خلال احتفالية قادرون باختلاف، لسه بتتكلم مع حد من صحابك يا ريس، قائلا: "مبقاش فيه فرصة إن أكلم صحابى وحتى كمان أسرتي وده تقصير مني بس الظروف هي اللى عملت كده، ظروف الوظيفة، لكن أنا غلطان".

وسأل الطفل آنس، الرئيس، قائلا: حضرتك بتشتغل كام ساعة في اليوم، ليرد الرئيس: " قول مبتشتغلش كام ساعة، عاوز أقولك إن معرفش أقعد من غير شغل لانى بحلم وعاوز كل الناس تحلم، ولما تحلم تجرى على حلمها، ولازم ربنا هيساعدها.

وواصل الرئيس مازحا: "اللى بيشتغلوا معانا زهقوا، والدكتور مصطفى مدبولي بيقول ارحمني بقا، لكن هنعمل إيه ؟ نفسنا نشوف بلدنا أحسن بلد في الدنيا، ويا رب يسمع منك ونفسنا نعملكم أحسن حاجة في الدنيا".

وسألت الطفلة بسملة الرئيس السيسي، حضرتك بتعرف تسوق طيارة؟، فمازحها الرئيس انتى غاوية موضوع الطيارة ده فعلا.. هطلب من وزير الدفاع أنك تركبي طيارة ثنائي مع أحد الطيارين، وهنصورك ونطلعك ونورى الناس وهى في الطيارة، وعلق الرئيس: البركة والرحمة موجودين معانا النهاردة".

وقالت الطفلة: حضرتك وأنت صغير كان نفسك تطلع إيه"، فرد الرئيس: كان نفسى أطلع طيار، ودخلت الكلية الجوية سنة 70 لكن محصلش نصيب".