بتشتغلي ولسه طفلك بيرضع؟ طفلك بيزهق أو بيتعب من الرضاعة؟ أسئلة كثيرة عن الرضاعة الطبيعية.. يجيب عنها د. أحمد أمين
إعداد: جهاد محمود صالح
الامهات اللي بترضع و بتشتكي ان لبنها خفيف لما تيجي تعصر..الامهات اللي بتضطر تعصر عشان بتنزل الشغل ..الامهات اللي بتشتكي ان الولد بيقعد يرضع كتير و بتزهق من الرضاعة..الامهات اللي بتغير بين الثديين في الرضاعة قبل ما تتأكد اللبن في واحد منهم خلص!!
انتبهوا للي جاي .. عشان نفهم
بصو للصورة دي كويس
دول كوبايتين فيهم لبن من نفس الأم .. من نفس الصدر .. في نفس الرضعة !!
١) اللبن الخفيف اللي لونه مدي على ازرق و عامل زي المية .. ده اللبن اللي بينزل في اول الرضعة (اول ٥ دقايق) و بنسميه foremilk
اللبن ده وظيفته يمد الطفل بالسوائل اللي محتاجها جسمه.
٢) اللبن التقيل اللي لونه مدي على اصفر و عامل زي السمنة .. ده اللبن اللي بينزل في اخر الرضعة ((بعد اول ٥ دقايق)) و بنسميه ال Hindmilk
اللبن ده وظيفته انه يمد الجسم بالمغذيات و البروتينات الضرورية لجسمه.
نفهم من كده ايه ؟
١)الطفل لازم يفضل على ناحية واحدة من صدرك لحد ما يفضى، مينفعش نستعجل و نغير بسرعة كده هنبقى بنرضعه مايه بس.
٢) الطفل طبيعي انه يزهق و يقريف و يعيط في وسط الرضعة، و ده لان في الاول اللبن الخفيف بينزل له بسهولة منغير ما يضطر يعمل مجهود عكس التقيل، مينفعش نزهق احنا كمان و نوقف رضاعة .. لازم نصبر.
٣) لما تيجي تعصري في الببرونة لازم تعصري للاخر حتى لو نزلتي في الاول كمية كفاية المسألة مش بس في الكم .. المهم الكيف.
و في الاخر متشتكيش ان لبنك خفيف .. لان طبيعي اول ما تعصري .. لازم ينزل خفيف .. متقلقيش
