هدى المفتي تكشف تفاصيل إصابتها بجلطة: «غرغرينا وعناية مركزة واستئصال جزء من الأمعاء»

الموجز    

كشفت الفنانة هدى المفتي، تفاصيل إصابتها بجلطة واستئصال جزء من الأمعاء بعد إجراء عملية جراحية كبيرة.

وقالت "المفتي"، حلال حوارها مع الإعلامية منى الشاذلي في برنامج "معكم" المذاع عبر فضائية "سي بي سي"،: "أنا من الناس اللي رجعت من الجونة بالكورونا، خلصت الكورونا وما أخدتش أدوية سيولة، فحصل لي جلطة بعدها بكذا شهر، ومعرفتش بيها".

وأضافت الفنانة الشابة: "الجلطة كانت في الوريد اللي بيوصل دم للأمعاء، وكنت بحس بحرقان وحاجات غريبة ونومي غريب، وكنت فاكرة أن عندي حاجة في القلب، وعملت رسم قلب لقيت مفيش حاجة".

وتابعت: "وفي رأس السنة كنت مسافرة مع واحدة صاحبتي إلى الأقصر وأسوان، وفجأة هناك تعبت تعب مش طبيعي، ووجع مؤلم في حياتي مشوفتهوش، وكنا في مركب وعلقوا لي محاليل، واتبهدلت، ولولا صاحبتي كانت معايا مكنتش هبقى موجودة، وكانت بتديني الدواء".

وأوضحت "المفتي": "قطعت الإجازة ورجعت القاهرة بطيارة، دخلت المستشفى والدكاترة مفيش حد عارف أنا عندي إيه وبطني عمالة تتنفخ، وأنا مكنتش فاهمة، وقرروا يعملوا عملية، وقولتلهم مفيش مشكلة افتحوا بطني، بس عايزة أخلص من اللي أنا فيه".

وأكملت: "الجلطة كانت في الوريد اللي بيوصل دم للأمعاء وبسبب عدم معالجته بسرعة عمل غرغرينا في الأمعاء، وتم استئصال جزء من الأمعاء، والعملية كانت كبيرة وقعدت في العناية المركزة شهر وشوية، وكان ممنوع الزيارة والأكل، اتبهدلت أوي، وكانت تجربة وحشة أوي، وعلمتني حاجات وخلت يبقى عندي أولويات معينة، وبدأت أفكر في حاجات بحياتي، خلاص لازم تتلغي، وعلاقتي بربنا اتحسنت أوي بعد الموضوع ده".

وأشارت الفنانة: "كنت في الأوضة 24 ساعة عيانة، وأختي الكبيرة بس اللي كان مسموح لها تدخل الأوضة، ومن كتر الأدوية، كنت بنسى اللي بره دول مين؟، عارفة العيون بس مش فاكرة الاسم إيه".

وقالت: "التجربة كانت عميقة، اللي بقوله ده السطح، بس بجد مبحبش أتكلم فيها، عشان في ناس ممكن تقول إني عايزة أكسب تعاطف الناس، وأنا أخر واحدة تعمل كده، واتعلمت أن أي حاجة ولها أخر، السعادة مؤقتة والوجع مؤقت، وكل حاجة مؤقتة، أنا حاليا واخدة إجازة مابعملش حاجة غير إني أشتغل ومركزة في صحتي النفسية".

وأنهت الفنانة الشابة هدى المفتي حديثها: "أنا قافلة على نفسي شوية سنة كدا بتعافى من أي علاقة قديمة، علاقة صداقة سامة، علاقة عاطفية سامة، عمل قدمته محققش النجاح اللي مستنياه، وأشتغل على مستقبلي، واقرأ واشتغل على نفسي كروح وإنسان، فقررت ما أركزش مع حاجة غير نفسي".

https://youtu.be/V6GtWb_6Rcw

تعليقات القراء