موضحة حقيقة طلاقها بسبب عبدالحليم حافظ.. فيفي عبده: «كل جوازاتي كانت عرفي ماعدا واحدة»

الموجز   

تحدثت الفنانة الاستعراضية فيفي عبده عن زيجاتها وذلك خلال استضافتها في برنامج "السيرة" الذي تقدمه الإعلامية وفاء الكيلاني والمذاع عبر فضائية "دي إم سي".

وقالت فيفي عبده: "أنا اتجوزت 5 مرات في حياتي وكلهم جوازات كانت عرفي ماعدا أول جوازة كانت شرعى"، مضيفة: "كنت صغيرة وقتها ومكنش عاوز يطلقني، ومن وقتها قلت لازم أتجوز عرفي عشان يبقى الموضوع سهل".

وأضافت الفنانة: "لما خلفت بناتي خليت الزواج شرعي، وأول مرة خلفت كان عندى 25 سنة، ويمكن اتجوزت كتير لأن أي ست لما تتطلق ومتبقاش مرتبطة بيطلعوا عليها اشاعات، وأنا كنت بحب أقطع عرق وأسيح دمه وأتجوز على طول".

وتابعت: "عمري ما عملت فرح قبل كده في كل زيجاتي، لكن في مرة كنت بصور فيلم اسمه الستات وقلت لمحمد جوزي تعالى ننزل من على السلم في زفة وكنت مخلفة وقتها هنادي بنتي".

وعن حقيقة طلاقها بسبب الفنان الراحل عبد الحليم حافظ، قالت فيفي عبده: "أنا أجرت شقة مخصوص في الزمالك عشان أقعد مع الفنانين لأنها كانت مشهورة بأنها قاعد فيها فنانين كتير، وفى مرة كنت مستنية زوجى في كافتيريا، وكان عنده اجتماع في نفس المكان اللى انا فيه ودخل عبد الحليم حافظ وشفيق جلال الكافتيريا ونده عليا، وقالى يابت بيقولوا عليكى رقاصة شاطرة، وقعدت معاه على الترابيزة ولما زوجى نزل وشافنى كان هيطلقنى بسبب كده".

وعن قصة حبها لشخص هندي، قالت فيفي: "اتعرفت عليه في لندن وطلعنا على الهند واتفقنا على الجواز، وفى مرة لما كان في لندن قالى انا جاى مصر بكرة، وأنا بيتقطع نفسى في بيتنا لان مفيش اسانسير وانا ساكنة في الدور الخامس، فروحت أجرت فيلا في المهندسين ووروحت اجيبه من المطار وانا رايحة على الفيلا مش عارفة مكانها وجيبت السمسار يودينى ليها بس معجبتهوش ولما اخدته البيت عند أمى حب المكان أوى، بس متقابلناش تانى لأن والدى وقتها اتوفى ومكنش ينفع أسيب اخواتى وأسافر معاه".