«مخدماتيه للاستاذة».. تعليق قوي من أمير كرارة على منشور الفنانة مها أحمد.. ورد ناري من شقيقة أحمد السقا

الموجز  

علّق الفنان أمير كرارة على الاتهامات التي وجهتها الفنانة مها أحمد له وللفنان أحمد السقا، بعد قرار الشركة المتحدة للخدمات الإعلامية بوقف التعامل مع المخرج محمد سامي.

وبحسب ما ذكرت صحيفة "الشروق"، كتب كرارة منشوراً عبر حسابه بموقع التواصل الاجتماعي "فيس بوك"، أكد خلله أن كل الوسط الفني كبار وصغار، يعرفون من هو أحمد السقا وكرارة، ومواقفهما تجاه زملائهما وأخوتهما الفنانين، سواء كبار أو صغار.

من جانبها، ردت فاطمة السقا، شقيقة الفنان أحمد السقا، على منشور الفنانة مها أحمد الأخير.

وقالت فاطمة، عبر صفحتها الخاصة بموقع "فيس بوك": "الكلام ده موجه ليكي يا أستاذة، بدل ما تفضلي تمسحي ردي كل شوية.. أبهرتيني يا مها بأخلاقك العالية، وبأنك افتكرتى العيش والملح اللى كلتيه فى البيت بتاع الفنان اللى مش عارفة تقولى اسمه بس عرفتى تقولى عليه (ندل) اللى هو أحمد السقا.. بس أنا باقولك قدام الناس، قطع لسان أى حد يقول عليه كده لأنه راجل أكرمك ووقف جنبك أنت ومجدى بدل المرة ألف".

وأضافت فاطمة السقا: "وأمير كرارة برضو راجل جدع ومحترم للى ما يعرفهوش فى البوست بتاعك ده.. معرفش إيه الفرص اللى كانت عندك اللى كان يتمنى يشتغل معاكى فيها زمان، بس هو أى حد يتمنى يشتغل معاه دلوقتى أكيد.. وكلمة الدور بينادي صاحبه دى بتاعة أفلام.. ما بتتقالش فى الحقيقة.. كفايا دراما وتشويه للناس"

وتابعت: "وبعدين هما كممثلين مش مطالبين يقفوا جنبك ولا يجيبولك أدوار على فكرة.. دى رؤية مخرج وناس بتوع كاستنج، الحقيقة أنا مش عارفة أنت عايزة إيه.. أنا مش شايفة بعد العشرة الطويلة اللى أنت قولتى عليها غير كمية الحقد والسواد والشماتة اللى كانوا متداريين ورا ابتسامة كدابة، معرفش أنت إزاى كنتى بتدخلى بيوتنا الصراحة وأنت ست وحشة كده".

واختتمت شقيقة أحمد السقا منشورها بالقول: "نسيت أقولك السب والتطاول ده بيدل على الأصل.. وإحنا بقى ولاد ناس، مع أننا عندنا كلام كتير أوى يتقال".

وكانت مها أحمد قد أثارت ضجة كبيرة مؤخراً على مواقع التواصل الاجتماعي بسبب منشور وجهت من خلاله رسالة قوية لنجمين بالوسط الفني لم تذكر اسميهما صراحة، حيث تحدثت كيف تعاملا معها رغم كونها ممثلة معروفة، وأبدت سعادتها بما حدث لهما في موسم رمضان الأخير.

وقالت الفنانة في منشورها:

"عوضي على الله، دى الجملة اللى دايما بقولها لما أتصدم في أشخاص، الحكاية يا سادة نجمين عملا مسلسل واتنجمت عليهما بنوتة لسه ألف باء تمثيل، واديتهم على قفاهم، وركبت عليهما إلى أن أصبحت بطلة المسلسل وبطلة الدعاية للمسلسل، وهما راضيين، رغم أن طول عمرهما مبيعملوش كده مع أي زميلة لهما أقربها أنا".

وأضافت: "النجم الأولانى بينى وبينه عيش وملح وزمالة، رشحت في مسلسل بطولته وكان بيقنعنى بدور، ولما وافقت بعتولى دور تانى معرفوش دور متعملوش واحدة مبتدئة، المفروض أنه عارف قيمتى الفنية، وعارف إنى إضافة له، اتهرب منى وماوقفش جنبى، وباعنى رغم أن الكل عارف إنى زى أخته (ندل)".

وتابعت مها أحمد: "أما التانى، كان في بداياته يتمنى يسلم عليا، ويقولى يا أستاذة، نزلت من نفسى وقولتله مش هنشتغل مع بعض، ما هي الحوجة مرة، رد وقالى الدور بينادى صاحبه، طبعا محكلكوش قد إيه ندمت نفسى وعشت أسود أيام حياتى عياط واكتئاب، وقولت عوضى عليك يارب".

وأكملت: "تمر الايام والاتنين يعلو ويتجمعوا مع بعض فمسلسل واحد( على عينهم طبعا) ويمثلوا وحش قوى تمثيل الكفار وطلعوا كمان مبيقروش اللى بيمثلوه وربنا يركب عليهم بنوته سنه اولى تمثيل وخبره ويتحول المسلسل والدعايه الدراما كامله لصالحها وهما (مخدماتيه للاستاذه) ."

واختتمت مها أحمد منشورها قائلة: "يمهل ولا يهمل ابدوا من جديد يااوفر تمثيل ياللى مبتقروش ياكمبارس جنب النجمه. نصيحه بلاش تتشطروا على اللى كان بينكم وبينهم عيش وملح بلاش تتشطروا على اساتذتكوا. ( عوضنا على الله ). يارب متحوجنا لحد حتى ولو كان اقرب الناس لينا"