بعد تهشيم 7 سيارات في «بورتو مارينا».. حمو بيكا للمتضررين: «كانوا واقفين في الممنوع.. ويقدروا يجيبوا غيرها»
الموجز
علّق مغني المهرجانات حمو بيكا على الأنباء التي تم تداولها خلال الساعات الماضية حول تعرضه لحادث انقلاب سيارة في بورتو مارينا بالساحل الشمالي، اليوم الإثنين، والذي أسفر عن تحطم 7 سيارات، وتحرير محضر ضده.
وقال "بيكا" في بث مباشر عبر صفحته الخاصة على موقع ”فيس بوك”: “والله ياجماعة في دلوقتي أخبار منزله، في حاجات فيها حقيقي وفي حاجات فيها كدب، هي فعلًا السيارة بتاعت مدير أعمالي هو عطاها لحد تاني يجيب بيها حاجات، وإحنا في الفندق جالنا تليفون وقالنا الحقوا العربية عامله حادثة، وروحنا بورتو مارينا لقينا الاثنين اللي كانوا في العربية واقعين على الأرض، كان كل هدفنا مش العربية بقى إحنا أهم حاجة اتطمنا على اللي جواها خلاص”.
وأضاف "بيكا": “كان فيه عربيات واقفة صف تاني واقفة في الممنوع، وكان في عربية كان ضهرها كله في الشارع، وهو بيلف الملف خبط العربية دي ومكنش شايف حاجه، طبعًا إحنا اتصورنا والناس بقت بتحب تنزل أي حاجة على فيس بوك، بس لما تيجي تكتب اكتب بعقل، هو دلوقت بخير وبيتحقق معاه في النيابة ومعاه المحاميين بتوعي، كله بيقول عربية حمو بيكا لأ هي عربية مدير أعمالي”.
وتابع: “وحدوا الله كده كل سنة وأنتم طيبين، واتطمنوا أنا بخير”، كما وجه رسالة للمتضررين من الحادث: “الحمد لله أنكم بخير ووافقين على رجليكم وتقدروا تجيبوا غيرها، محدش بيهرب من قضاء ربنا، فيه واحد بيبقى نايم في أمان يصحوا يلاقوه ميت، اللي بيجي في الحديد بيتصلح إنما البني آدمين مبتتصلحش”.
وقال مغني المهرجانات: ” أصلا كل اللي واقف كان واقف صف تاني غلط يعني، وأنتوا عارفين إن الساحل زحمة، والبني آدم بيخطأ، الحمد لله أن الكل بخير ومحدش حصله حاجه، وكلها كانت سليمة، هي بس العربيات كانت واقفة وهو كان بيجري وخبط في العربية دي وبعدين الإير باك فتح فشد العربيات اللي وراها”.
وكان رواد مواقع التواصل الاجتماعي وبعض المواقع الإخبارية قد تداولوا أنباء عن تعرض مغني المهرجانات "حمو بيكا" لحادث انقلاب سيارته في بورتو مارينا بالساحل الشمالي.
وانتشرت صوراً لحمو بيكا وهو يقف في مكان الحادث، فيما لم يتم التأكد بعد من ما إذا كان قد تعرض مغني المهرجانات للحادث أم مدير أعماله، وفقاً لما ذكرته عدد من المواقع الإخبارية.
وبحسب صحيفة "اليوم السابع"، فإن شقيق مغني المهرجانات أكد في تصريحات لها أن "حمو بيكا في البيت وميعرفش حاجة عن الموضوع".
وأوضح أن "حمو بيكا" كان يقف وسط الناس متفرجاً ويحاول مساعدة صاحب الحادث، مشيراً إلى أن السيارة التي تعرضت للحادث ليست سيارة شقيقه.
وأكد "مصطفى دولسيكا"، وكيل أعمال حمو بيكا، أنه هو من تعرض للحادث وليس مغني المهرجانات.
ونقل موقع "القاهرة 24" عن دولسيكا قوله إن حمو بيكا لم يتعرض لحادث مثلما أشيع صباح اليوم، موضحاً أنه هو من تعرض للحادث وأنه استغاث بمطرب المهرجانات لينقذه.
من جانبه، روى شاهد عيان يدعى “عمرو نجيب”، تفاصيل حادث حمو بيكا، واصطدامه بـ7 سيارات، صباح اليوم الاثنين، بالساحل الشمالي.
وقال نجيب، في تصريحات نقها موقع "القاهرة 24"، إنه في تمام الساعة السادسة والنصف صباحًا، تفاجئ سكان مارينا 2، بتصادم سيارة حمو بيكا نوعها “أوبل” واضعة نمرة تجارية، بـ7 سيارات آخرين بينهما “Bmw”، حيث كان أصحاب هذه السيارات لا يزالون نائمين في منازلهم.
وأضاف شاهد العيان أن الشرطة وجدتهم مخمورين قائلًا: “كانوا سكرانين ونزلوا واحد منهم وقالو إن هو اللي عمل الحادثة، اسمه محمد أبو اليزيد، وبعدين أخدوه على المستشفى وعملو له تحليل وطلع إيجابي تعاطي حشيش، وهيتعرض على النيابة بليل، وحمو بيكا فضل قاعد في عربيته بره لحد الساعة 1 ظهرًا”.
وأكد شاهد العيان أن جميع السيارات تضررت من تصادم حمو بيكا، كما أنه عرض على أحد المتضررين أن يصلح العطل المتواجد بها، ولكن سرعان ما أخذه محاميه: “المحامي بتاعه أخده بره القسم وقاله أنت ملكش دعوه بالموضوع”.